Ditën e sotme në stadiumin “Elbasan Arena” u përballën në një ndeshje miqësore Shqipëria dhe Kosova.
Skuadra e Edi Rejës, këtë ndeshje e nisi me formacionin 4-3-3 dhe rezultoi të ishte zgjedhja e duhur.
Kuqezinjtë edhe pse jo në formën e tyre më të mirë të mundshme arritën të shënojnë që në minutin e 31′ falë një goli të shkodranit Bekim Balaj dhe asistit nga Myrto Uzuni. Ky gol solli më tepër vetëbesim për tanët të cilët prej disa kohësh “kanë harruar” të shënojnë edhe pse luajnë mjaft mirë.
Pjesa e parë u mbyll me këtë rezultat edhe pse futbollistët kuqezi u treguan më shumë këmbëngulës dhe luftarak për të dyfishuar rezultatin, i cili erdhi në pjesën e dytë.
Këtë herë ishte vetë Myrto Uzuni që solli golin e dytë në minutën e 64′ falë asisitit të Lindon Selahi, i cili ishte një prurje e re në Kombëtaren tonë por që rezultoi shumë efektive.
Edhe dardanët tentuan disa herë të shënojnë, por në minutin e 85-të në ndihmë i erdhi lojtari ynë Ramen Çepele i cili shkaktoi një penallti dhe i dha mundësinë Muriqit të rikthehej me gol te Kosova, duke e çuar rezultatin e ndeshjes 2-1.
Edhe pse u akodruan 3 minuta shtesë, rezultati nuk ndryshoi më, kuqezinjtë fituan bindshëm me rezultatinh 2-1 dhe i rikthyen nderin Kombëtares e cila në ndeshjen e fundit përballë Kosovës më 29 maj 2018 kishte humbur me rezultatin 3-0./Iconstyle.al/
