Kombëtarja jonë në orën 18:00 do të zbresë në fushën e blertë të stadiumit “Air Albania” për një ndër ndeshjet më të rëndësishme të momentit, ndaj Kazakistanit për Ligën e Kombeve.
Kombëtarja jonë do të zbresë në fushë me shumë mungesa pasi disa prej lojtarëve nuk janë lejuar të udhetojnë për shkak të masave kufizuese që ekipet e tyre kanë marrë për të ndaluar përhapjen e Covid-19, por edhe për shkak të dëmtimeve fizike që lojtarët kanë pësuar.
Kujtojmë këtu Kumbullën, Roshin, Strakoshën apo Trashin e Lenjanin të cilët nuki mundën t’i bashkoheshin djemve të tjerë.Por edhe pse me mungesa dhe me probleme, ka lajme të mira për teknikun Reja pasi të premten u bashkua me grupin një nga elementët më thelbësor në skemat e tij, Klas Gjasula ndërsa do të jenë në dispozicion edhe Broja e Cikalleshi. Të dy lojtarët kanë lënë pas dëmtimet dhe do të jenë një opsion më shumë për teknikun italian, mbi të gjitha sulmuesi i Viteshe i cili po kalon një formë shumë të mirë në kampionatin holandez.
Por Kombëtarja jonë vjen nga një fitore në përballjen miqësore ndaj Kosovës ditën e mërkurë ku kuqezinjtë e Rejës fituan me rezultatin 2-1 me golat e Balajt dhe Uzunit. Kjo duket se i ka dhënë më shumë siguri dhe forcë djemve tanë dhe trajnerit teknik i cili në përballjen e sotme ku synimi i vetëm është fitorja ka vendosur të mos eksperimentojë me titullarët e kësaj ndeshje.
Para Berishës në portë, do të rreshtohen tre mbrojtësit, Ismajli, Gjimshiti dhe Veseli. Pas një mungese të gjatë me shumë mundësi do të kthehet Memushaj, teksa mesfusha plotësohet me Gjasulën dhe Abrashin, ndërsa Hysaj dhe Doka në krah. Cikalleshi po ashtu pritet të luajë titullar, ndërsa në balotazh janë Uzuni dhe Manaj, me të parin më të favorizuar për fanelën e titullarit pas paraqitjes së shkëlqyer që bëri ndaj Kosovës me një gol dhe asist.
Në dy ndeshjet e radhës përballë Kazakistanit dhe Bjellorusisë, Shqipërisë i duhet të fitojë për të rrëmbyer kreun e grupin dhe për ti dhënë më shumë qetësi trajnerit për pjesën e mbetur të Ligës së Kombeve dhe për të vijuar me besim e shpresë projektin e FSHF-ës për të synuar kualifikimin për në “Euro2024”.
