Kombëtarja e Shqipërisë luan më 31 mars ndeshjen e tretë ndaj San Marinos në këtë edicion kualifikues për rrugëtimin drejt “Katar 2022”. Pas fitores në Andorrë, është radha për të marrë një tjetër 3 pikësh. Kuqezinjtë kanë luajtur dy miqësore me këtë kundërshtar, të fituar 3-0, ndërsa këtë të mërkurë, do të luajnë ndeshjen e parë zyrtare me përfaqësuesen që renditet e fundit në klasifikimin e FIFA-s, në vend të 210.
Por cila do të jetë axhenda e kuqezinjve të Rejës? Kombëtarja shqiptare do të niset sot në drekë drejt San Marinos, aty ku të mërkurën do të zhvillohet ndeshja e radhës për eliminatoret e Botërorit.
Rreth orës 13:00 ekipi ynë përfaqësues i futbollit do të niset nga Rinasi dhe pritet të mbërrijë pas 2 orësh. Më pas do të zhvillojnë seancën stërvitore të pasdites. Edhe të martën do të ketë stërvitjen zyrtare dhe konferencën për shtyp të trajnerit dhe kapitenit përpara ndeshjes, e cila do të luhet të mërkurën në orën 20:45.
Kjo do të jetë dhe sfida e fundit për kuqezinjtë tanë për këtë raund të kualifikuesve dhe futbollistët e Kombëtares do të rikthehen më pas në skuadrat e tyre respektive. Pas dy ndeshjeve kualifikuese kundër Andorrës dhe Anglisë, Shqipëria ka tre pikë në grupin e saj.
