Ditën e sotme, Gjykata e Lartë ka lënë në burg pronarin dhe administratorin e “Alba ekzotik fruit”.
Eduart Dauti dhe Bajron Gumeni kërkonin një masë më të butë sigurie, por Gjykata e Lartë ka lënë në fuqi vendimin e Apelit Durrës, raporton Ballkan Web.
Ata akuzohen për trafik kokaine lidhur me sasitë e drogës që janë gjetur në konteinerët me banane që vinin për llogari të kompanisë “Alba ekzotik fruit” në portin e Durrësit, në 6 episode në sasi të ndryshme prej disa kg.
Kujtojmë që Dauti u arrestua në prill të këtij viti për akuzën e trafikut të drogës në kuadër të grupit të strukturuar kriminal. Sipas prokurorisë, në konteinerët me banane që vinin nga Amerika Latine në Portin e Durrësit të porositura nga kompania “Alba Exotic Fruit” u gjetën sasi kokaine në gjashtë raste të ndryshme. 51-vjeçari ka mohuar akuzat përballë gjykatës, duke kërkuar edhe masë më të butë sigurie, por togat e zeza rrezuan kërkesën e tij.
Vlen të theksojmë se Eduart Dauti është administrator dhe aksioner me 90% i kompanisë “Alba ekzotik fruit”. 10% të aksioneve i ka Barjon Gumeni, i arrestuar në 13 korrik 2021, pas kapjes së ngarkesës së radhës me kokainë në kontejnerin e kompanisë. Barjon Gumeni ka ndryshuar emrin dhe është vëllai i Eduart Dautit.
