Pesë persona, mes tyre katër shqiptarë të moshës 26-54 vjeç, janë arrestuar në Greqi pasi u është gjetur 2 kg kokainë dhe 1.5 kg marijuanë, teksa mësohet se një pjesë e drogës u gjet e fshehur në një oxhak në banesën e tyre në Perama.
Operacioni policor u zhvillua në Selanik, ku sipas mediave greke, grupi i të arrestuarve trafikonte sasi të mëdha kanabisi dhe kokaine.
Midis të arrestuarve është një çift shqiptarësh, një burrë 35-vjeçar dhe gruaja e tij 26-vjeçare, që janë cilësuar nga policia greke, si kokat e grupit kriminal.
Mësohet se gjatë operacionit u sekuestruan në cilësinë e provës materiale, sasi lëndësh narkotike të fshehura në oxhak 67,000 euro, dy pistoleta me 17 fishekë, fletore ku mbasheshin shënime me veprimtarinë e bandës, si dhe tre makina e një motor që përdoreshin prej tyre për transportin e drogës.
Autoritet kanë bërë kërkime edhe në Chortiatis e Analipsi, ku janë vënë në pranga edhe persona të tjerë, të dyshuar si anëtarë të bandës.
