198 turistët e parë për këtë sezon turistik kanë mbërritur mbasditen e të premtes në Shqipëri.
Ata janë nga Minsku i Bjellrusisë dhe këtë sezon veror jo të zakonshem, kanë zgjedhur ta kalojnë këtu.
Si asnjëherë më parë mbërritja e tyre në aeroportin e Rinasit është festuar, ndërsa vetë Ministri i Turizmit dhe Mjedisit Blendi Klosi mori pjesë në cermoninë e pritjes së tyre, duke dhuruar lule për turistët
Klosi u shpreh se ky është një event i rëndësishëm për rindezjen e motorit të turizmit, ndërsa priten edhe grupe të tjera turistësh nga vendet e baltike.
Këto momente Klosi i ndau në rrjetet e tij sociale, duke shkruar se ka dhënë 189 lule për 189 turistë.
Statusi i plotë
189 lule sot 🌺për 189 turistët e parë që vijnë në Shqipëri. Eshtë charteri🛩 i parë turistik jo vetëm në Shqipëri🇦🇱, por dhe Europë🇪🇺. Megjithatë kjo duhet të na bëjë më të kujdesshëm 😷dhe të zbatojmë protokollet shëndetësore. #respektojmërregullat #smilealbania😊
https://www.facebook.com/klosiblendi/photos/a.2592567091030919/2592567124364249/?type=3&sfnsn=mo
Mirëpo, komentuesit kanë sulmuar ministrin duke u ankuar se u janë anuluar fluturimet për të ardhur në Shqipëri, ndërkohë që presin turistë.
Një tjetër shkruan se njerëzit kanë mbetur rrugëve të Europë me fluturimet që shtyhen çdo ditë.
“Gazetareforma.com” kontaktoi me njërin prej tyre, i cili na tregoi se fluturimi i tij nga Spanja drejt Budapestit dhe më pas drejt Shqipërisë ishte anuluar në momentin e fundit për shkak se Shqipëria kishte mbyllur doganat.
Për më tepër, ata as nuk janë rimbursuar nga shteti për anulimin e paprecedentë të fluturimit të tyre.
Zyrtarisht rreth kësaj çështjeje nuk ka asnjë reagim, teksa që në fillim të epidemisë raste të tilla janë denoncuar pa fund në media.
Gjatë 3 muajve të pandemisë, teksa të gjithë duhet të ishin të sigurtë në shtëpinë e tyre, me qindra shqiptarë janë endur rrugëve të Europës, por jo vetëm, pasi qeveria nuk është kujtuar për ta.
Madje fillimisht, kjo e fundit refuzoi t’i lejonte të hynin të atdhe sepse i konsideroi të rrezikshëm, por më pas nisi procesin e riatdhesimit, që u shoqërua me probleme edhe më të mëdha.
Në një kohë kur masat kufizuese po lehtësohen gjithnjë e më shumë e qeveria pret me trëndafila turistët e huaj, përse nuk kujtohet me të njëjtën dashamirësi edhe për qytetarët shqiptarë?
A kemi të drejtë të mendojmë në këtë rast se veprimet e qeveritarëve janë më shumë për marketing të mirë, se për politikë të mirë?
Deri në përgjigjen e këtyre pyetjeve, dhjetëra shqiptarë duhet të enden rrugëve dhe askush mos të kujtohet për ta.
