Banorët e fshatit Guri i Bardhë në Xibër, të bashkisë Klos, kanë dalë sërish në protestë këtë të enjte, duke kundërshtuar ndërtimin e dyte dy hidrocentraleve në zonë. Banorët e këtij fshati kanë kërkuar që të anulohet leja për ndërtimin e kësaj vepre, ndërsa kjo nuk është hera e parë që ata e bëjnë diçka të tillë. Sipas tyre, ata janë të vendosur se nuk do ta lejojnë ndërtimin e ktyre HEC-eve, pasi fshati i tyre është përzgjedhur nga qeveria në listën e 100 fshatrave turistikë dhe ata synojnë të investojnë në agro-turizëm.
Siç ka raportuar Gazeta Reforma, edhe banorë të fshatrave përreth, siç është rasti i atyre të fshatit Fullqet, kanë protestuar kundër ndërtimit të HEC-eve në këto zona, pasi sipas tyre dëmtojnë burimet ujore të zonës dhe ekosistemin. Shtatë vite më parë është miratuar leja për ndërtimin e 2 HEC-eve në pellgun ujëmbledhës të përrenjve të Zallit të Dishit dhe të Shehut, ndërkohë që banorët e kundërshtojnë këtë projekt. Ndonëse kompania që ka marrë me koncesion ndërtimin e këtyre HEC-eve nuk ka nisur ende punën, banorët kërkojnë anulimin e lejes së dhënë.
