Një nga zonat që po përballet me varfërinë ekstreme në vendin tonë është Veriu i Shqipërisë, madje kjo zonë sipas të ardhurave renditet më e varfra në Europë.
Sipas të dhënave të Eurostat, në një raport të 2016-s për prodhimin e brendshëm bruto ku u përfshinë 28 vende, të ardhurat e banorëve të Veriut të Shqipërisë janë vetëm sa 23.8% e mesatares së shteteve të Bashkimit Europian.
Shqipëria është e ndarë në tre rajone, Veriu, Jugu dhe Qendra. Të ardhurat për frymë të Veriut janë shumë më të ulëta sesa rajoni i dytë më i varfër në listë, që është Severozapaden i Bullgarisë, me 29.47%.
Rajoni i tretë më i varfër i Europës është Jugu i Shqipërisë, me 29.52% të mesatares së Bashkimit Europian, më pas renditen Mayotte në Francë (33.27%), dy rajone të Bullgarisë, Yuzhen tsentralen (33.53%) dhe Severen tsentralen (33.95%).
Qendra e Shqipërisë, ndonëse është më e pasur sesa Veriu dhe Jugu, duke pasur të ardhura për frymë sa 34.45% e mesatares së BE, sërish është ndër më të varfrat e Europës, duke u renditur e shtata nga fundi.
Si një e tërë, të ardhurat për frymë të Shqipërisë janë sa rreh 30% e mesatares së BE-së, duke e renditur edhe si shtet si më të varfrin e Europës. Serbia dhe Maqedonia e kanë këtë tregues në rreth 37% dhe 35% përkatësisht, ndërsa në Mal të Zi është rreth 40%.
Burimi: Monitor
