Policia ka ndaluar në Qafë-Thanë një 28-vjeçar indian, i cili kishte përdorur një pasaportë të falsifikuar për të kaluar kufirin.
Mësohet se indiani ia kishte vjedhur pasaportën një tjetër shtetasi indian. Në pranga ka rënë indiani Santos Easwaran.
Sipas njoftimit zyrtar të Policisë, shërbimet e Policisë Kufitare të Qafë Thanës në dalje të Republikës së Shqipërisë, kanë goditur dy raste të paligjshmërisë, konkretisht:
Gjatë verifikimit të dokumentacionit të shtetasit indian Ssantos Easwaran 28 vjeç, rezultoi se ky shtetas ishte paraqitur me një pasaportë të dyshuar si të falsifikuar, e cila i ishte vjedhur një shtetasi tjetër indian.
Gjithashtu, gjatë kontrollit të ushtruar në mjetin tip “Toyota” të shtetasit polak M. M., 52 vjeç, iu gjet një armë gjahu tip pushkë (pneumatike) pa lejen përkatëse, e cila iu bllokua në cilësinë e provës materiale.
Veprimet e mëtejshme proceduriale në lidhje me këto raste, u kryen nga specialistët për hetimin e krimeve në Komisariatin e Policisë Pogradec, të cilët bënë arrestimin në flagrancë të shtetasit S. E., si edhe filluan procedimin penal në gjendje të lirë ndaj shtetasit M. M.
Materialet i kaluan Prokurorisë të Rrethit Gjyqësor Pogradec për veprime të mëtejshme.
