Policia e Lezhës ka arrestuar një 24-vjeçar pasi iu gjetën dy mina me telekomandë të fshehura në trupin e tij. Sipas njoftimit policor, i dyshuari po udhëtonte në drejtim të Lezhës me qëllim të shitjes së minave grupimeve kriminale. Sektori për Hetimin e Krimeve të Rënda, në bashkëpunim me Seksionin kundër Trafiqeve të Paligjshme, ka organizuar operacionin policor të koduar “Horizonti”, duke ndaluar 24-vjeçarin pranë Milotit dhe sekuestruar dy mina me telekomandë, të përbëra nga lëndë plasëse C4 për shpërthim në distancë. Dyshohet se i arrestuari vetëmontonte minat për t’u shitur grupimeve kriminale.
Pas procedurave të para, shtetasi A. S., 24 vjeç, banues në Fushë Krujë, u arrestua në flagrancë dhe materialet procedurale u kaluan në Prokurorinë pranë Gjykatës së Shkallës së Parë të Juridiksionit të Përgjithshëm Lezhë për veprime të mëtejshme. Punohet për dokumentimin e plotë të rrethanave të rastit dhe për identifikimin e të përfshirëve të tjerë në këtë veprimtari kriminale.
