Në fshatin Mesopotam të Finiqit kanë nisur prej disa ditësh punimet për restaurimin e Kishës së Shën Kollit, një monument unik i trashëgimisë bizantine në jug të Shqipërisë.
Ky objekt, që daton në periudhën e Perandorisë Bizantine, është një nga shembujt më të rrallë të arkitekturës dhe ikonografisë së asaj epoke në vendin tonë.
Gjatë procesit të restaurimit, ekipi i specialistëve ka bërë një zbulim të rëndësishëm. Drejtuesja e projektit, Anna Karajani, deklaron se janë identifikuar murale të papara më parë, të fshehura për shekuj nën shtresat e suvase.
“Gjatë restaurimit kemi zbuluar fytyra shenjtorësh dhe fragmente murale të shekullit të XIV-të, të cilat ishin mbuluar nga lyerjet e periudhave më të vona. Zbulimi i tyre ka qenë një moment shumë emocionues për ekipin”, tha Anna Karajani.
Punimet po realizohen edhe me mbështetjen e Ambasadës Greke në Tiranë. Ambasadorja greke Konstantina Kamitsi e konsideron restaurimin si një akt që forcon marrëdhëniet kulturore mes dy vendeve.
“Restaurimi i saj është një dhuratë jo vetëm për historinë shqiptare, por edhe për marrëdhëniet e mira ndërfqinjësore. Greqia do të vazhdojë të mbështesë projekte të tilla”, u shpreh Kamitsi.
Kisha e Shën Kollit, e ndërtuar në periudhën e Perandorit Bizantin Kostandin IX Monomaku, vlerësohet si një prej monumenteve më të rëndësishme të trashëgimisë bizantine në Shqipëri.
Punimet po zhvillohen në kuadër të një memorandumi bashkëpunimi ndërmjet Ministrisë së Ekonomisë, Kulturës dhe Inovacionit dhe Qendrës Evropiane për Monumentet Bizantine dhe Post-Bizantine.
