Kina ka deklaruar se nuk mund ta pranojë planin e Organizatës Botërore të Shëndetësisë për fazën e dytë të studimit në lidhje me origjinën e Covid-19. Deklarata erdhi të enjten nga Zeng Yixin, zv / ministri i Komisionit Kombëtar të Shëndetësisë.
Ai u shpreh se ishte i befasuar nga thirrja për një hulumtim të mëtejshëm të origjinës së pandemisë dhe konkretisht, teoria se virusi mund të ketë rrjedhur nga një laborator kinez. Këtë të fundit ai e quajti një thashethem që bie ndesh me mendjen e shëndoshë dhe shkencën.
“Është e pamundur që ne të pranojmë një plan të tillë për gjurmimin e origjinës”, tha ai në një konferencë shtypi thirrur për të adresuar çështjen e origjinës COVID-19.
Prej kohësh kërkimi mbi origjinën e koronavirusit është bërë një çështje e nxehtë në marrëdhëniet diplomatike mes vendeve perëndimore dhe Kinës. SHBA dhe aleatët e saj thonë se Kina nuk ka qenë transparente s ai përket asaj që ka ndodhur në ditët e para të pandemisë.
Madje pak kohë më parë, Tedros Adhanom Ghebreyesus, drejtori i përgjithshëm i OBSH-së, tha se ishte i hershëm përjashtimi i mundësisë se virusi mund të ketë dalë nga një laborator. Ai shtoi se edhe vetë ka punuar në laborator dhe e di se gabime mund të ndodhin.
