Ambasadorja amerikane, Yuri Kim ka zhvilluar sot një takim me kreun e bashkisë së Vlorës, Dritan Leli. Gjatë takimit, Leli theksoi se Vlora është një shembull i bashkëpunimit të pushtetit qëndror me atë lokal.
“Vlora është shembull i bashkëpunimit të pushtetit qendror me atë lokal. Ndryshimet në infrastrukturë kanë sjellë investimet”, u shpreh Dritan Leli.
Ndërsa, ambasadorja amerikane u shpreh se për Shqipërinë është shumë e rëndësishme Reforma në Drejtësi. Sipas saj duhet të sundojë ligji, në mënyrë që amerikanët të kenë besim dhe të investojnë në Shqipëri.
“Kisha dëgjuar gjëra të bukura për Vlorën por duke ecur në rrugët e qytetit pashë që qyteti juaj ofron shumë. Teksa është kënaqësi për mua të shoh ndryshimet e Vlorës ndër vite. Nëse në Shqipëri zbatojmë gjërat që na rekomandohen, ligjet atëherë e gjithë Shqipëria do të eci përpara. Është tepër me rëndësi zbatimi i reformës në drejtësi në mënyrë që të sundojë ligji dhe amerikanët të kenë besim të investojnë në Shqipëri”, tha Kim.
Ndërkohë marrëdhëniet mes Ramës dhe Lelit janë ftohur. Më 28 qershor, kryeministri Edi Rama i tërhoqi “veshin” kryebashkiakut të Vlorës, Dritan Lelit. Ky veprim i Ramës erdhi nga pakënaqësitë gjithnjë e në rritje të qytetarëve të Vlorës ndaj administratës së bashkisë dhe kryetarit të saj. Madje Rama e paralajmëroi Lelin se mandati i tij mund të mbarojë shumë shpejt.
