Kryetari i KZAZ-së nr. 30 në Tiranë, Remzi Mehmeti, ka folur për mediat lidhur me incidentin që ndodhi mesditën e së enjtes në qendrën e numërimit të votave në Kashar, ku u godit nga një vëzhgues.
Mehmeti sqaroi se konflikti nisi për shkak të një vote të kandidatit të PS-së, Orlando Rakipi, e cila po kontestohej nga disa vëzhgues. Ai tha se ka kallëzuar penalisht personin që e goditi.
“Vëzhguesit po kundërshtonin me zë të lartë një votë. U afrova për t’i qetësuar, por ata filluan të ofendonin dhe të bërtisnin,” tregoi Mehmeti.
Kryetari i KZAZ-së shtoi se kur paralajmëroi për largimin e tyre nga salla, situata u acarua dhe doli jashtë kontrollit:
“I njoftova se do kërkoja largimin e tyre, por ata kaluan perimetrin e sigurisë dhe njëri prej tyre më goditi.”
Ai theksoi se vota në fjalë për kandidatin Rakipi duhej të vlerësohej nga KZAZ-ja sipas procedurave, por kjo nuk u lejua nga vëzhguesit.
“Kemi kallëzuar penalisht personat e përfshirë, të cilët nuk i njohim. Jemi të vendosur të kryejmë detyrën pavarësisht këtyre situatave,” tha Mehmeti.
Policia ka ndaluar 26-vjeçarin Rei Nozlli lidhur me ngjarjen.
