Gjykata e Posaçme kundër Korrupsionit dhe Krimit të Organizuar pritet të zhvillojë sot, në orën 10:00, seancën gjyqësore për shqyrtimin e kërkesës së Ilir Metës për zëvendësimin e masës së sigurisë “arrest në burg” me një masë më të lehtë.
Avokatët e ish-presidentit kanë paraqitur argumentet e tyre për lirimin nga qelia.
Meta u arrestua më 21 tetor 2024 dhe akuzohet, së bashku me bashkëshorten e tij, deputeten Monika Kryemadhi, se kanë bashkëpunuar me funksionarë të tjerë shtetërorë, në disa episode përgjatë 15 viteve të fundit, për të shfrytëzuar pozitat publike në favor të kompanive private.
Hetimet përfshijnë edhe dyshime për veprimtari lobuese në SHBA dhe transaksione shitblerjeje banesash, ku dyshohet se janë përfituar shuma të mëdha parash të fshehura përmes mosdeklarimit në ILDKPI dhe KQZ.
Kryemadhi është nën hetim nga SPAK për tre vepra penale: pastrim parash, korrupsion dhe mosdeklarim të të ardhurave.
Më 23 tetor 2024, Gjykata vendosi për të masën “detyrim për t’u paraqitur” pranë Policisë Gjyqësore, e njëjta masë që iu dha edhe të hetuarës Ema Çoku për pastrim parash.
Ndërkohë, për Piro Xhixhon, i akuzuar për korrupsion pasiv, masa e sigurisë është lehtësuar nga “arrest në shtëpi” në “detyrim për t’u paraqitur”. Të tre të hetuarit që ndodhen nën këtë masë sigurie duhet të paraqiten një herë në muaj në zyrat e Policisë Gjyqësore të SPAK.
