Gjykata e Tiranës ka refuzuar kërkesën e prindërve të 3-vjeçarit Brian Spahiu, i cili ndërroi jetë pas një ndërhyrjeje dentare në një klinikë private në tetor të vitit 2023.
Bledar dhe Ina Spahiu i ishin drejtuar gjykatës për të detyruar Prokurorinë të informonte familjen mbi ecurinë e hetimeve dhe t’u vinte në dispozicion aktet që nuk konsiderohen sekret, përfshirë edhe kartelën mjekësore të fëmijës.
Gjykata penale e rrëzoi këtë kërkesë, me argumentin se familjarët e viktimës nuk janë bashkë-ushtrues të hetimit penal dhe nuk kanë të drejtë të ndërhyjnë në veprimet që kryhen nga organi i akuzës. Megjithatë, përmes padisë së tyre, prindërit kishin kërkuar të njiheshin me rezultatet e aktit të ekspertimit dhe të drejtonin pyetje ekspertëve që kanë kryer analizën mjeko-ligjore.
Avokati i familjes, Jordan Daci, theksoi se mungesa e transparencës është shqetësuese:
“Kërkojmë të na informojnë për fazën e hetimeve, të na japin kopje të akteve që nuk përbëjnë sekret dhe të na bëjnë me dije emrat e ekspertëve, qofshin edhe të huaj, që t’u drejtojmë pyetjet tona. Ende nuk kemi asnjë përgjigje se pse po zgjasin hetimet dhe pse është shmangur Instituti i Mjekësisë Ligjore.”
Brian Spahiu ndërroi jetë më 1 tetor 2023 në repartin e reanimacionit të Pediatrisë në QSUT, tre ditë pas ndërhyrjes dentare në klinikën “Splendent”, e cila funksionon brenda ambienteve të një spitali privat në Tiranë.
Për këtë rast, në hetim në gjendje të lirë janë babë e bijë, Roland dhe Ina Xhaxho, të dy nën akuzë për “neglizhencë në trajtimin mjekësor” një kundërvajtje penale që në fazën fillestare nuk parashikon masë sigurie me arrest në burg.
Ndërkohë familja e vogëlushit vijon të kërkojë transparencë dhe përgjigje për vdekjen e fëmijës së tyre.
