Sot u zhvillua një seancë në Gjykatën e Posaçme për zgjatjen e afateve për ish-kryeministrin Sali Berisha, ndërsa për nesër është parashikuar një seancë në Gjykatën e Lartë për një kërkesë të tij për masën e sigurisë.
Berisha akuzohet për korrupsion në bashkëpunim me dhëndrin e tij, Jamarbër Malltezi, lidhur me procedurat e privatizimit të ish-klubit sportiv Partizani. SPAK ka shtyrë afatet e hetimit për 3 muaj të tjerë.
Gjykata ka marrë vendimin për të mos pranuar kërkesën për zëvendësimin e masës së sigurisë për Berishën. Avokati i tij, Genc Gjokutaj, theksoi pas seancës se kërkesa e tyre është të ndryshohet masa, duke argumentuar se gjykatat kanë bazuar vendimet e tyre mbi një dispozitë të shfuqizuar gjashtë vite më parë dhe se SPAK nuk ka gjetur asnjë provë të re gjatë hetimit.
“Gjykata shpalli vendimin për të dy duke rrëzuar kërkesën për zëvendësimin e masës së sigurisë. Kërkimet tona nuk do të shterojnë, duke pasur synim ndryshimin e masës. Një nga elementët bazë të kërkesës sonë është se kjo gjykatë ka vendos mbi një dispozitë të shfuqizuar gjashtë vite më parë. Kodi i ri nuk parashikon komunikimin e zotit Berisha vetëm më personat që bashkëjeton, kjo është depozita e vjetër, e reja ka ndryshime që mund të takohet edhe me të tjerë. Një tjetër çështje është se SPAK, gjatë gjithë hetimeve nuk ka asnjë provë të re”, tha avokati i zotit Berisha, Genc Gjokutaj, pas përfundimit të seancës.
