Gjykata e Posaçme ka emëruar një ekspert mjeko-ligjor për të vlerësuar gjendjen shëndetësore të ish-shefit të komisariatit rrugor të Tiranës, Roven Zeka, i cili kërkon të lirohet nga paraburgimi me pretendimin se ka pësuar një dëmtim në legen pas një rrëzimi në qeli.
Vendimi për kërkesën e tij do të merret bazuar në përfundimet e ekspertit mjekësor, ndërsa Zeka vijon të mbahet në burg për shkak të hetimeve që po kryen SPAK ndaj tij, në lidhje me dyshime për korrupsion gjatë trajtimit të një aksidenti rrugor.
Më herët, Gjykata e Apelit për Korrupsionin dhe Krimin e Organizuar ka lënë në fuqi masën e arrestit me burg për Zekën dhe për oficerin Edison Tabaku, të përfshirë në të njëjtën dosje hetimore.
Ndërkohë, një tjetër zyrtar i policisë, Sokol Novaku, i cili ka mbajtur funksionin e shefit të hetimit të aksidenteve, është liruar nga burgu dhe ndodhet në arrest shtëpie për arsye familjare.
