Gjykata e Posaçme Kundër Korrupsionit dhe Krimit të Organizuar ka rrëzuar kërkesën e Suel Çelës për heqjen e masës së sigurisë “arrest në burg”, të caktuar ndaj tij në maj të vitit 2022, pas operacionit “Plumbi i Artë”.
Çela, i njohur ndryshe si Marjus Lula, është akuzuar si drejtues i një organizate kriminale dhe për të njëjtën arsye është mbajtur në arrest.
Ai u shpall në kërkim pas dëshmisë së Nuredin Dumanit, i cili ka dëshmuar se Çela ka qenë i përfshirë në porositjen e vrasjes së biznesmenit Lulzim Masha pranë Liqenit Artificial, një vrasje që nuk u realizua.
Përgjimet e Sky Ecc zbuluan gjithashtu se ai dyshohet se ka porositur edhe vrasjen e dy personave të tjerë, Elton Kilës dhe Ardjan Çapjas.
Për veprimet e tij, Çela është akuzuar për krime të rënda, përfshirë trafikimin e kokainës nga Amerika Latine.
Dy javë më parë, GJKKO vendosi të ruajë masën e sigurisë “arrest në burg” për të, pasi ai dyshohet se kryen një rol kryesor në udhëheqjen e një grupi kriminal të përfshirë në aktivitete të shumta të jashtëligjshme.
