Djali i ish-kryeministrit Berisha, Shkëlzen Berisha, ka humbur betejën gjyqësore në Gjykatën e Floridës, kundër autorit të librit “Watch Dogs” (Qentë e luftës), Guy Lawson.
Lawson në librin e tij ka përshkruar tragjedinë e Gërdecit dhe aferën e tregtimit të armëve kineze e sovjetike trafikantit amerikan Efraim Diveroli.
Në librin “Watch Dogs”, i cili më pas u bë edhe film, Lawson përmendte edhe emrin e Shkëlzen Berishës, të cilit i vendoste nofkën “Sypeshkaqeni”.
Për këtë arsye Shkëlzen Berisha kërkoi nga autori i librit, dëmshpërblim 60 milionë dollarë për prishje të imazhit.
Kujtojmë se në mars të vitit të kaluar, Gjykata e Floridës rrëzoi pretendimet e Shkëlzen Berishës dhe vendosi në favor të autorit amerikan Guy Lawson. Pas rrëzimit të pretendimeve nga ana e tij, Shkëlzen Berisha apeloi vendimin e gjykatës së shkallës së parë me pretekstin se nuk kishte kohë të përgatiste mbrojtjen.
Pas apelimit, gjykatësit në Gjykatën e Apelit në SHBA kanë rrëzuar përsëri pretendimet e Shkëlzen Berishës duke u shprehur ndër të tjera se: “Autori i librit, Guy Lawson u mbështet në gjetjen e fakteve në shumë artikuj të publikuar më parë të cilat akuzonin Shkëlzen Berishën si të përfshirë në mashtrimin e kompanisë AEY dhe me botën kriminale të nëndheshme shqiptare. Lawson shkoi më tej duke intervistuar edhe persona te tjerë të cilët pohuan të njëjtën gjë për zotin Berisha,”, shkruhet ndër të tjera në vendimin e Apelit.
Gjyqtarët amerikanë në vendimin e tyre janë shprehur se nuk kanë gjetur asnjë gabim në vendimin e gjykatës së Floridas dhe theksojnë se: “Shkëlzen Berisha nuk solli argumente të bazuara, përmes të cilave të mbërrinte në përfundimin se gjykata e distriktit abuzoi duke mos i dhënë kohën e duhur për të sjellë provat”.
Pas vendimit të Gjykatës së Apelit, djali i ish-kryeministrit Berisha, jo vetëm që nuk do të përfitojë 60 milionë dollarë, sipas pretendimit të tij për prishje imazhi, por do t’i duhet të paguajë 1.2 milionë dollarë tarifë shtetit amerikan, për shpenzimet gjyqësore.
