Policia kërkon amnisti për 20 mijë makina të sekuestruara. Në një takim me Deputetët e Komisionit parlamentar të Sigurisë, drejtori i Policisë së Shtetit, Ardi Veliu, i kërkon Parlamentit t’i japë leje policisë që makinat e sekuestruara prej 25 vitesh t’i shesë për skrap. Pronarët e këtyre mjeteve nuk i tërheqin, pasi vlera e gjobës ka kapërcyer disafish vlerën e mjetit.
Në ambientet e komisariateve të policisë ndodhen 20 mijë automjete të cilat janë sekuestruar ndër vite. Propozimi i drejtorit të Policisë së Shtetit kërkon që Parlamenti të miratojë një amnisti për automjetet që janë grumbulluar deri në vitin 2013 dhe të dërgohen për skrap.
“Gjobat që duhet të paguajnë për parkim apo gjoba të tjera e kalojnë disafish vlerën e këtij mjeti dhe pronari ka zgjedhur të lërë mjetin fare në ambientet e policisë. Parlamenti i nderuar të nxjerrë një amnisti për të gjitha mjetet që deri në 2013 janë magazinuar apo kanë ardhur në ambientet e drejtorive të policisë”.
Ky ndryshim pritet të ulë koston e policisë për qiranë e magazinave dhe rojet. “Konsumoj gati 400 punonjës policie që ruajnë këto ambiente apo pikat e marra me qira për të siguruar ruajtjen e këtyre. Ka shpenzime kolosale për pagesën e qirave të këtyre ambienteve”, tha Veliu..
/GazetaReforma.com/
