Prokuroria e Korçës ka nisur një procedim penal ndaj shtetasit Y.B., i cili është punonjës në Bashkinë e Pogradecit, për veprën penale “Kanosje për shkak të detyrës.”
Sipas informacioneve, Y.B. dyshohet se ka kërcënuar një gazetar, shtetasin A.B., i cili ka bërë denoncimin publik të kërcënimit.
Procedimi penal, me numër 1415 dhe datë 07.11.2024, është regjistruar nga Prokuroria pranë Gjykatës së Shkallës së Parë të Juridiksionit të Përgjithshëm në Korçë, pas denoncimit të gazetarit për kërcënim.
Prokuroria ka deklaruar se do të ndjekë këtë çështje me përparësi dhe do të informojë publikun për ecurinë e hetimeve, duke marrë parasysh interesin e madh publik për këtë ngjarje.
