Sulmet kibernetike të kthyera tashmë në makth duket se do të vazhdojnë të rriten. Sekretari i Përgjithshëm i NATO-s, Jens Stoltenberg ka dhënë paralajmërimin e tij për zmadhimin e këtij fenomeni në internet dhe sisteme kompjuterike.
Për median gjermane Funke, Stoltenberg ka thënë: “Nuk do të ketë më një konflikt pa dimensionin e tij kibernetik në të ardhmen”.
“NATO është e përgatitur për skenare të tilla por ende duhet të bëjmë më shumë,” vijoi Stoltenberg.
Sulmet kibernetike janë një rrezik i vazhdueshëm dhe mbi të gjitha shumë serioz, por mbi të gjitha “infrastruktura kritike të energjisë, sektorit financiar si dhe institucionet shëndetësore dhe demokratike janë në rrezik dhe tashmë kemi përjetuar sulme të ngjashme”, ka vijuar fjalën e tij sekretari i Përgjithshëm i NATO-s.
Stoltenberg tha se sulme të tilla mbi një vend anëtar të NATO do të merrte përgjigjen e përbashkët të të gjitha vendeve.
“NATO ka vendosur që një sulm kibernetik ndaj një vendi anëtarë mund të çojë në përgjigjen e mbarë aleancës. Të tilla sulme ka po aq kosto sa edhe humbja e jetëve në sulme të tjera,” vijoi Stoltenberg.
