Presidenti i Federatës Shqiptare të Futbollit, Armando Duka, ka reaguar nëpërmjet një njoftimi në faqen e tij zyrtare, në lidhje me situatën e paprecedentë të krijuar së fundmi nga tifozët fashistë të Lazios, të cilët kërcënuan kapitenin e Kombëtares shqiptare, Elseid Hysaj, për këngën “Ciao Bella” të kënduar gjatë prezantimit me klubin lacial.
Kreu i organit më të lartë të futbollit në vend i ka shprehur mbështetjen maksimale futbollistit kuqezi, teksa është i bindur se vlerat e Hysajt do të triumfojnë përballë dhunës verbale e idiologjike të tifozëve të kaltër të Lazios, të cilët mbrëmjen e djeshme kanë kërcënuar futbollistin.
Mesazhi i presidentit të FSHF, Armando Duka:
“I dashur Elsi,
Ti je dhe do të mbetesh jo vetëm një futbollist i mrekullueshëm, por edhe një personalitet i botës së futbollit. Fakti që ke kënduar një këngë, as e cënon e as i jep të drejtë askujt që të vërë në dyshim personalitetin tënd.
Jam koshient se vlerat e tua do të triumfojnë përballë dhunës verbale e idiologjike, që nuk kanë asnjë lidhje me futbollin dhe vlerat e këtij sporti magjik. Vazhdo puno e stërvitu, jep më të mirën tënde siç ke bërë gjithmonë. Ne të gjithë të duam e të mbështesim”, shkroi Duka.
