Vera e vitit 2021 ka sjellë si asnjëherë tjetër përmbytje massive, zjarre të pakontrollueshme e valë të nxehti përvëluese në shumë rajone të botës. Por me sa duket, kjo verë nuk do të jetë e vetmja, pasi dukuri të tilla pritet të jenë normaliteti i ri.
Një raport klimatik i OKB-së parajamëron se temperatura më të nxehta, mot më të ashpër, dhe-në disa raste-dëmtime të pakthyeshme klimatike na presin në vazhdim. Raporti konfirmoi gjashtë vitet e fundit si më të nxehtat të regjistruara ndonjëherë dhe për më tepër ndryshime të mëdha klimatike, të tilla si rritja e nivelit të detit, janë të pashmangshme dhe të pakthyeshme.
Publikimi i raportit vjen pasi një pjesë e Europës po përballet ende me zjarret shkatërruese e po ashtu edhe Shtetet e Bashkuara të Amerikës. Kjo pasi një muaj më parë Europa, Kina, SHBA u goditën gjithashtu nga përmbytjet massive.Dy pjesët e tjera të raportit do të dalin vitin e ardhshëm.
“Vëzhgimet këtë verë tregojnë se disa ndikime (të parashikuara në raportet e mëparshme të IPCC) duket se janë nënvlerësuar, por ne nuk mund të dimë nëse shkatërrimi i verës 2021 është normalja e re pa të dhëna edhe për disa vite të tjera”, tha Simon Lewis, profesor i shkencës së ndryshimeve globale në University College London, në një intervistë me Guardian.
Zhvendosja globale drejt një normaliteti të ri me më shumë zjarre mund të ketë filluar që në fund të vitit 2019 dhe fillimin e vitit 2020, kur zjarret e mëdha shkatërruan shkurret, pyjet dhe kafshët e egra në Australi dhe Brazil. Rreth 3 miliardë kafshë mendohet se janë vrarë ose plagosur gjatë zjarreve në Australi.
