Më herët ditën e sotme u raportua se Dhoma e Tregtisë së Maqedonisë, në një analizë që ka bërë për pasojat e Covid-19 në ekonomi ka krahasuar ndër të tjera të dhënat e numrit të të papunëve që ka shkaktuar kjo krizë e paprecedentë.
Dhe sipas përfundimeve të këtij studimi numri i vendeve të punës së humbura në Serbi e Maqedoni është rreth 10 herë më i ulët se ai i raportuar në Shqipëri.
Lidhur me këtë lajm ka ardhur edhe reagimi i Partisë Demokratike, pasi sekretari i Përgjithshëm Gazmend Bardhi, me anë të një statusi në Facebook shkruan se kryeministri Rama është arsyeja se pse Shqipëria është vendi i fundit në rajon për ndihmën ndaj qytetarëve dhe biznesit.
Ai vijon më tej, duke shkruar se “Edi Rama ka dhënë vetëm 41.5 milionë euro për 3 milionë shqiptarë, aq sa paguan 2 oligarkë tek Unaza e Re.”
Sipas numrit dy të PD, gjendja nga pandemia është shumë e rënduar, pasi po mbyllen bizneset dhe vendet e punës dhe sipas tij vendi ynë ka humbur 10-fishin e vendeve të punës krahasuar me vendet e rajonit.
Postimi i plotë:
Për shkak të Ramavirusit, Shqipëria është vendi i fundit në rajon për ndihmën ndaj qytetarëve dhe biznesit. Edi Rama ka dhënë vetëm 41.5 milionë euro për 3 milionë shqiptarë, aq sa paguan 2 oligarkë tek Unaza e Re.
Gjendja është shumë e rënduar mga pandemia ekonomike, e shkaktuar prej një qeverie dhe kryeministri të dështuar. Bizneset po mbyllen dhe, bashkë me to, edhe vendet e punës. Kemi humbur 10fishin e vendeve të punës, në krahasim me vendet e rajonit, që do të thotë më shumë varfëri, më pak zhvillim. Shqiptarët nuk e meritojnë të jenë për gjithçka të fundit vetëm se kanë një qeveri që i vjedh dhe i braktis në ditën më të keqe.
