Teksa u arrestua për ryshfet një punonjës i bashkisë së Tiranës, ish-kandidati i opozitës për Tiranën, Belind Këlliçi ka reaguar ashpër ndaj ‘strategjisë; që sipas tij SPAK ka zgjedhur. Në statusin e tij, Këlliçi ka shigjetuar dhe SPAK duke thënë se të vërtetat duhet të kishin dalë në momentin e duhur. Ndërsa shton se bashkia aktuale, model ka korrupsionin, aktivistin dhe patronazhistin.
“1 milion lekë për të ecur përpara
Këto para kërkojnë t’ia marrin një hallexhiu për punë.
E gjejnë në hall dhe duan t’i marrin shpirtin. 1 milion lekë për të fituar mbijetesën, në një bashki ku model kanë korrupsionin, aktivistin dhe patronazhistin.
Kjo është bashkia juaj edhe për 4 vitet e ardhshme. Një skuadër patronazhistësh të korruptuar që bëjnë krenar kryetarin. Do kishte qenë mirë që këto të vërteta që dalin tani në ekran, të shfaqeshin në kohën e duhur, ndërsa SPAK priti me durim zgjedhjet për të nisur goditjet ndaj Bashkisë Tiranë. Heshtje e blerë. Interes publik i shitur”, shkruan Këlliçi.
Theksojmë se një punonjës i bashkisë së Tiranës ka marrë ryshfet 1 milion lekë qytetarit në këmbim të një vendi pune. Në lidhje me rastin e transmetuar mbrëmjen e djeshme, në emisionin investigativ “Stop”, që bënte fjalë për një rast korrupsioni të kryer nga një shtetas që ushtron funksion publik, policia bën me dije se, menjëherë pas publikimit të pamjeve filmike, organizuan punën për kapjen dhe vënien përpara përgjegjësisë ligjore të shtetasit që shfaqet në video.
