Ditën e sotme Policia dhe RENEA kanë nisur akison në qytetin e Elbasanit, në kërkim të personave të shpallur në kërkim në kuadër të operacionit “Plumbi i Artë”.
Forcat e policisë janë parë gjatë orëve të para të mëngjesit në Elbasan, duke ushtruar kontrolle të imtësishme në disa biznese dhe banesa.
Ky operacion vjen pas atij të pak ditëve më para, ku SPAK lëshoi 32 urdhër-arreste.
Operacioni i ndërmarrë nga SPAK goditi 8 grupe kriminale në Elbasan, Durrës dhe në Tiranë. Operacioni në fjalë ka ardhur menjëherë pas arrestimit të shumë të kërkuarit Nuredin Dumani, i cili u kap gjatë operacionit policor të koduar “Arratia” në Fier.
Dumani thuhet se është njeriu “kyç” për SPAK që ka çuar në hedhjen dritë në shumë ngjarje kriminale të ndodhura në vendin tonë.
Mbi Nuredin Dumanin rëndojnë akuza të shumta, ku një prej tyre është edhe ajo e vrasësit me pagesë.
Kujtojmë se pas dëshmisë së Nuredin Dumanit dhe Henkrik Hoxhaj të cilët kanë marrë statusin e bashkëpunëtorëve të drejtësisë, janë zbardhur një sërë ngjarjes duke nisur që nga viti 2011 e deri më tani. Pas operacionit “Plumbi i artë” që u zhvillua të enjten e javës që shkoi, policia ra në gjurmët e shumë ngjarjeve që nga grabitjet deri tek vrasjet e bujshme të ndodhura në 10 vitet e fundit.
Mes të arrestuarve është edhe emri i Gentian Sharrës, i cili sipas dëshmive të Dumanit, është i përfshirë në disa grabitje, deri tek ajo e Rinasit në vitin 2019.
