Zhvillimi i zgjedhjeve presidenciale në SHBA këtë vit, ndryshe nga 4 vite më parë, nuk e ka përfshirë në eufori dhe deklarata politike të anshme kryeministrin shqiptar Edi Rama.
Madje duket se zhvillimet që vijnë nga përtej Atlantikut, e kanë gjetur si të papërgatitur kryeministrin Rama, për të cilin “gojët e liga” po përflasin se nuk i ka më fort mirë marrëdhëniet me “Rrugën e Elbasanit”.
Kjo gjë u pa edhe sot kur kryeministri Rama, i gjendur në siklet, shmangu sot një koment lidhur me zgjedhjet në SHBA.
Gjatë një konference për mediat, Rama u pyet se kë do të preferonte të ishte Presidenti i 46-të i SHBA-ve mes Donald Trump dhe Joe Biden.
Rama i gjendur përball kësaj pyetje “jashtë teme”, deklaroi se: “I kam të dy miq, nëse do më thonit se kë do të preferoja mes Lulzim Bashës dhe Monika Kryemadhit, pa diskutim që do të zgjidhja Lulin”.
Duket se Rama ka reflektuar nga qëndrimi i mbajtur 4 vite më parë, kur në zgjedhjet amerikane ishin përballë Donald Trump dhe Hillary Clinton.
Në atë kohë, kryeministri Rama, u rendit jo vetëm në krah të Clinton, por pasi bëri fushatë për të, e konsideroi zgjedhjen e Donald Trump si “fatkeqësi për njerëzimin”.
“Donald Trump është një kërcënim për Amerikën, dhe padyshim, një kërcënim për marrëdhëniet Shqipëri-SHBA”,- deklaronte Rama, 4 vite më parë.
Gjatë Presidencës “Trump”, kryeministri Edi Rama, nuk ka mundur të zhvillojë asnjë vizitë zyrtare në Shtëpinë e Bardhë, edhe pse ka pasur disa takime me Presidentin Donald Trump, gjatë samiteve të NATO-s.
/GazetaReforma.com/
