Kryeministri i vendit Edi Rama i është përgjigjur akuzave të Presidentit Ilir Meta. Gjatë inspektimeve të vaksinimit në Vlorë, Rama tha se Meta ka kohë që nuk sillet si President i vendit.
Sipas kryeministrit, Meta është thjesht një shpërdorues i funksionit të Presidentit në favor të ndërrmarjes që administruar nga e shoqa, duke nënkuptuar kështu LSI-në.
“Presidenti ka kohë që nuk është më president. Është thjeshtë një shpërdorues funksionit të presidentit në favor të ndërmarrjes që administrohet formalisht nga e shoqja. E mirëkuptoj se vjen në Vlorë natën, fshehurazi, shkon lart e poshtë natën. Shfaqet në makina pa protokollin përkatës. Takon njerëz, mesa duket jo aq shumë dhe i duket e zbrazur komplet Shqipëria, për shkak se tani shumë pak njerëz besojnë tek LSI-ja. Në këto kushte duhet ta mirëkuptoni të gjithë që i duket si katastrofë”, tha Rama.
Kujtojmë se një ditë më parë. Presidenti Ilir Meta me anë të një reagimi në rrjetin social Facebook, paralajmëroi se vendi po shkon drejt një katastrofe kombëtare.
Sipas tij problemi qëndron në dështimin e menaxhimit nga qeveria dhe strategjia e ndjekur deri më tani, që sipas Metës nuk është e duhura.
“Situata po shkon drejt një katastrofe kombëtare, që duhet parandaluar pa humbur më kohë. Çdo ditë, që kalon, do të thotë më shumë pasoja për shëndetin dhe jetën e qytetarëve, mbrojtja e të cilëve duhet të jetë prioriteti ynë absolut. Propagandë duke luajtur me jetët e shqiptarëve nuk mund të ketë dhe nuk do lejohet të ndodhë”,deklaroi dje Meta.
