Komisioni i Ankesave dhe Sanksioneve (KAS) ka refuzuar me shumicë votash kërkesën e Partisë Demokratike për shpalljen të pavlefshme të rezultatit të zgjedhjeve parlamentare në qarkun Kukës. Me këtë vendim, mbetet në fuqi tabela e rezultateve aktuale, ku Partia Demokratike fiton dy mandate dhe Partia Socialiste një mandat.
Ky vendim i KAS mbyll procesin e shqyrtimit të ankesës së PD-së dhe konfirmon që nuk do të ketë përsëritje të zgjedhjeve në Kukës.
Në ankesën e saj, PD pretendonte se zgjedhjet janë zhvilluar në një mjedis të padrejtë dhe me ndikim të paligjshëm, duke akuzuar për:
• Përdorimin e administratës publike dhe burimeve shtetërore në favor të Partisë Socialiste, duke krijuar një garë të pabarabartë dhe mungesë transparence.
• Angazhimin e zyrtarëve publikë në fushatë për shpërndarjen e përfitimeve dhe ushtrimin e presionit ndaj votuesve që mbështesnin opozitën.
• Shpërndarjen selektive të ndihmave sociale, emërimeve dhe investimeve publike si mënyrë për të blerë vota.
• Vështirësitë dhe pengesat që opozita përjetoi, përfshirë aksesin e kufizuar në media dhe presionin institucional.
• Përdorimin e grupeve kriminale për intimidimin e votuesve, sidomos në zonat rurale, përmes patrullimeve dhe bllokimeve rrugore.
• Pretendimin se, pa këto ndërhyrje, PD do të kishte fituar të tre mandatet në Kukës, pasi votat e partive të tjera do të ishin neutralizuar mes tyre.
• Probleme të evidentuara në raportin paraprak të OSBE-ODIHR, përfshirë intimidim, përdorim të burimeve shtetërore dhe dështimin e procesit të votimit nga diaspora për shkak të mungesës së transparencës dhe moszbatimit të detyrimeve ligjore.
• Mungesën e dëshmive nga KQZ dhe kompania postare DHL lidhur me dërgimin e fletëve të votimit të diasporës në adresat e regjistruara të votuesve.
Me këto pretendime, PD kërkonte anulimin e zgjedhjeve, por KAS i konsideroi të pamjaftueshme dhe la në fuqi rezultatin aktual në Kukës.
