Pas rinumërimit të pjesshëm të kutive të votimit në qarqet Tiranë, Durrës, Elbasan dhe Fier, Komisioni i Ankesave dhe Sanksioneve ka rrëzuar kërkesën e Partisë Demokratike për pavlefshmëri absolute të zgjedhjeve në këto zona.
Anëtari i KAS, Ilirian Rusmajli, mbërriti i pari në seancë për të dhënë vendimin, i cili vlerësoi se rezultatet e shpallura nga KQZ ishin të vlefshme dhe pa ndikime të rënda në integritetin e procesit.
Pavarësisht se rinumërimi solli vetëm një ndryshim mandati brenda Partisë Socialiste në qarkun e Fierit, PD këmbënguli në kërkesën për shpalljen e pavlefshmërisë në të katër qarqet.
Përfaqësuesi i PD në KQZ, Marash Logu, renditi 27 qendra votimi me probleme në Elbasan, duke vijuar më tej me pretendime për parregullsi edhe në qarqet e tjera, por KAS i rrëzoi njëzëri.
Ndërkohë, kandidati demokrat Aulon Kalaja zhvilloi një protestë përpara selisë së KQZ, duke kërkuar rinumërimin e plotë të votave në Durrës dhe jo vetëm një pjesë të tyre, siç ndodhi në praktikë.
Në një deklaratë për mediat, Kalaja pranoi se përpjekja e tij për transparencë u sabotua nga brenda partisë së tij, megjithëse procesi u mbështet publikisht nga Sali Berisha.
Kalaja ka paralajmëruar se do të depozitojë një kallëzim penal në SPAK ndaj numëruesve që, sipas tij, kanë manipuluar votat në favor të një kandidati tjetër të PD-së në Durrës, duke i deformuar rezultatet e votës preferenciale.
PD pritet të ndjekë më tej ankimimin në Kolegj Zgjedhor.
