Kryeministri Edi Rama ka publikuar pamjet nga dy takimet elektorale të zhvilluara dje në kuadër të fushatës elektorale në Tiranë. Ky është dhe reagimi i parë i Ramës pas fjalimit hapës që mbajti dje në sheshin “Skënderbej”.
Me anë të një postimi në rrjetet sociale, kryeministri publikoi disa foto nga tubimet e djeshme, duke i cilësuar dy kartolina nga dy botë të ndryshme. Në pamjet e publikuara shiheshin grumbullimet në tubimin e Partisë Demokratike dhe takimi ndryshe i zhvilluar nga Partia Socialiste.
“MIRËMËNGJES🌹
dhe me këto kartolina nga dy botë, ju uroj një ditë të mbarë të gjithëve😍”, shkruan Rama.
Kujtojmë se dje u çel zyrtarisht fushata elektorale për zgjedhjet që priten të mbahen pas një muaji më 25 Prill.
Për shkak të pandemisë së koronavirusit, beteja politike pritet të zhvillohet kryesisht në rrjetet sociale, apo në tubime të vogla informative, në bazë të protokollit që tashmë është miratuar nga Komiteti Teknik i Ekspertëve.
Takimi i PS u organizua në sheshin kryesor të kryeqytetit “Skënderbej” në orës 18:00. Ajo që u vu re ishte një pjesëmarrje e ulët në shesh dhe zhvendosja e simpatizantëve online. Pra fushata ishte një risi pasi ishte thuajse e mbështetur në platformën digjitale.
Ndërsa takimi i PD u zhvillua në sheshin “Nënë Tereza” në orën 17:00. Në këtë ceremoni, së bashku me krydemokratin Lulzim Basha, ishin pranishëm edhe të gjithë kandidatët e Partisë Demokratike, në 12 qarqet e vendit.
Edhe pse në kushte pandemie, u vu re një mbipopullim i sheshit. Një pjesë e simpatizantëve kishin ardhur me makina ndërsa pjesa tjetër ishin me flamuj e pankarta në duar.
