1.3 ton kokainë janë kapur sot në Maqedoninë e Veriut në një magazinë frutash, pasi janë transportuar me një kamion bananesh.
Kamioni ka kaluar nga Shqipëria përmes pikës kufitare të Hanit të Hotit, në Shkodër, dhe më pas ka dalë nga pika kufitare e Qafë Thanës, duke hyrë në Maqedoninë e Veriut, aty ku u kap, para se të mbërrinte në destinacionin final, Slloveni.
Mësohet se policia shqiptare ka qenë në dijeni të këtij mjeti, i cili është futur dje në Shqipëri, pasi ka kaluar nga Mali i Zi dhe SPAK ka qenë duke monitoruar gjithçka.
Në megaoperacionin për kapjen e sasisë në fjalë kanë marrë pjesë përveç forcave maqedonase, edhe DEA amerikane, Guardia di Finanza, policia shqiptare dhe policitë e disa vendeve të tjera dhe deri më tani kanë rënë në pranga tre persona, dy shoferë dhe një magazinier, që punonin në këtë magazinë.
Së fundmi detaje të reja janë zbardhur rreth ngjarjes në fjalë, ku mësohet se pronarët e kompanisë që kishte porositur banane janë dy vëllezër shqiptarë Sefyllah dhe Enver Hebibi.
Po ashtu, lëndët narkotike ishin nisur nga Kolumbia dhe e gjithë dërgesa peshonte 1.3 ton, por policia italiane kishte zbuluar kanalin përmes të cilës do transportoheshin lëndët narkotike, duke vënë një GPS në kamionin e mbushur me banana me qëllim që të mësonte destinacionin përfundimtar.
Policia në Maqedoninë e Veriut nuk ka dalë ende në një reagim zyrtar dhe pritet që një gjë të tillë ta bëjë nesër, ku do sqarojë të gjithë operacionin.
