Detaje të reja janë zbuluar nga kapja e 400 kilogramëve kokainë në Lipjanë të Kosovës, në një kamion që kishte kaluar tranzit nga porti i Durrësit. Mësohet se deri më tani, të paktën 7 persona janë vënë në prangat e Policisë, për shkak se akuzohen se janë të përfshirë në rrjetin që trafikoi kokainën, me një vlerë mbi 20 milionë euro.
Sipas raportit të Policisë së Kosovës, përveç kokainës janë gjetur dhe sekuestruar gjithashtu edhe dy pistoleta “TT”, 50 copë fishekë të kalibrit 7.62 mm, 26 mijë euro “cash”, 200 denar MK, një makinë, 6 telefona celularë, 6 PC, dy lap-top, katër DVR dhe një “Hard Disc”.
Raporti i Policisë së Kosovës:
“Drejtoria e Hetimeve të Trafikimit me narkotik në koordinim me policinë italiane dhe shqiptare, pas një hetimi të përbashkët gjatë kontrollit në depon e një kompanie kanë gjetur dhe sekuestruar një sasi substancë të dyshuar narkotike të llojit kokainë në peshë prej 400 kg.
Ndërsa gjatë kontrollit në disa lokacione tjera janë gjetur dhe sekuestruar: dy revole një TT dhe tjetra me gas, 50 copë fishekë të cal. 7.62 mm, 25925 € para kesh, 200 denar MK, një veturë, 6 telefona celular, 6 PC, dy llap top, katër DVR dhe një Hard Disc”, thuhet në njoftimin e bërë nga policia e Kosovës.
Shtatë të dyshuar meshkuj kosovar janë arrestuar dhe me vendim të prokurorit dërgohen në mbajtje”.
