Ambasadorja e Shteteve të Bashkuara të Amerikës, Yuri Kim ka komentuar operacionin ndërkombëtar që çoi në kapjen e 400 kg kokainë në Lipjan të Kosovës. Kim thotë se kapja e kokainës është rezultati i bashkëpunimit të fortë të SHBA, Italisë, Shqipërisë dhe Kosovës.
Ajo vlerëson rolin e SPAK dhe Policisë shqiptare si të rëndësishëm në sulmin kundër trafikantëve ndërkombëtarë të drogës e krimit të organizuar.
“Kapja e djeshme e 400 kg kokainë është rezultat i bashkëpunimit të fortë midis SHBA, Italisë, Shqipërisë, Kosovës. SPAK & Policia e Shtetit Shqiptar, DEA, luajtën një rol të rëndësishëm në këtë sulm kundër trafikantëve ndërkombëtarë të drogës dhe krimit të organizuar.”, ka shkruar ambasadorja amerikane Yuri Kim.
Kujtojmë se një kontejner me 400 kg kokainë, që ka kaluar nga Porti i Durrësit, u kap në Kosovë ditën e djeshme. Burime bëjnë me dije se kokaina ishte e fshehur në një kontejner me mish që vinte nga Brazili. Kamioni u lejua të kalonte tranzit në Shqipëri ndërsa u krye dorëzimi i kontrolluar në Lipjan. Bëhet fjalë për një operacion të përbashkët, të mirëorganizuar dhe i koordinuar në mënyrë perfektë mes Policisë Italianë, Policisë së Shtetit dhe Policisë Kosovare. Mësohet se në këtë operacion Policia Shqiptare ishte pjesë themelore e procesit, të dorëzimit të kontrolluar të kokainës. Gjithashtu bëhet e ditur se kamioni ishte i regjistruar në Prishtinë, ndërsa është mbajtur nën vëzhgim i gjithë itinerari i tij për 10 ditë.
