Mbrojtësi shqiptar Breat Gjimshiti është bërë një nga lojtarët kryesorë të Atalantës që kur ka mbërritur në klubin bergamez. Puna e tij e palodhur duket se I ka dhënë edhe rolin e një lideri në skuadër, teksa me mungesat ndaj Torinës, Gjimshiti mund të marrë shiritin e kapitenit.
Në një intervistë për Corriere Bergamo, qendërmbrojtësi u tregua modest, duke thënë se diçka të tillë do e vendosë trajneri.
“Kjo do të vendoset nga trajneri, por secili lojtar që do të marrë shiritin do të marrë përgjegjësinë e tij, duke e vendosur përvojën e tij në shërbim të skuadrës”, tha Gjimshiti.
I pyetur se cili ishte sulmuesi më I vështirë për t’u markuar, Gjimshiti ka thënë se pa dyshim është Romelu Lukaku I Interit.
iSeria A ka sulmues shumë të fortë, duke luajtur kundër tyre është një nxitje për të bërë më mirë. Më i vështiri është padyshim Lukaku “, tha mbrojtësi.
Ndërkohë, Atalanta do të luajë në Champions League në sezonin që do të fillojë dhe lojtari e ka një preferencë për kundërshtarin që do i caktojë shorti.
“Ne jemi duke pritur për shortin, por nëse do të duhej të zgjidhja një kundërshtar, do të doja të luaja kundër Bayern Munchen. Edhe si fëmijë isha tifoz i kësaj skuadre dhe do të doja të luaja kundër tyre”, ka thënë Gjimshiti.
