Një 33-vjeçar i shpallur në kërkim ndërkombëtar është arrestuar nga policia në Tiranë, pas një operacioni të përbashkët me autoritetet italiane. Shtetasi shqiptar Erjon Mera rezulton i dënuar nga Gjykata e Apelit të Napolit me 8 vjet e 6 ditë burgim, për tre vepra penale të rënda.
Sipas njoftimit të policisë, Mera është dënuar për “Grabitje me armë”, “Vrasje e mbetur në tentativë” dhe “Armëmbajtje pa leje”, vepra të parashikuara nga Kodi Penal Italian.
Arrestimi i tij është realizuar si pjesë e operacionit policor të koduar “The Wanted”, në vijim të punës së strukturave të Interpol Tiranës në bashkëpunim me Interpol Romën. Në aksion morën pjesë edhe Seksioni për Hetimin e Krimeve të Rënda ndaj Personit dhe Seksioni i Pastrimit të Parave dhe Aseteve Kriminale.
Aktualisht, Interpol Tirana është në proces të procedurave ligjore për ekstradimin e Erjon Merës drejt Italisë.
