Dritan Gjika, 47-vjeçari shqiptar i shpallur dy herë në kërkim ndërkombëtar nga Interpoli, është arrestuar sot në Dubai. Arrestimi i tij u realizua në kuadër të një operacioni të koordinuar nga Njësia Kombëtare e Interpolit në Ekuador, në bashkëpunim me autoritetet e Abu Dabit dhe Spanjës.
Gjika akuzohet nga drejtësia ekuadoriane për trafik ndërkombëtar droge, pastrim parash dhe drejtim të një organizate kriminale. Sipas të dhënave zyrtare të migracionit, ai kishte hyrë për herë të parë në Ekuador në vitin 2009 me vizë të përkohshme vizitori.
Në vitet që pasuan, Dritan Gjika u bë një nga personat më të kërkuar në vend, pasi sipas autoriteteve, ai drejtonte një rrjet të fuqishëm kriminal që vepronte në Ekuador dhe Spanjë, duke trafikuar sasi të mëdha narkotikësh drejt vendeve të Amerikës Qendrore dhe Europës, në veçanti në Holandë, Belgjikë dhe Spanjë.
Organizata e tij kriminale përbëhej nga nivele të ndryshme strukturore, duke përfshirë drejtues, logjistikë dhe bashkëpunëtorë, të cilët realizonin veprimtarinë e paligjshme me ndihmën e kompanive të ligjshme për pastrimin e parave dhe fshehjen e operacioneve tregtare dhe financiare.
Një rol kyç në këtë rrjet kishin edhe punonjësit e porteve detare, të cilët shërbenin si informatorë. Ata ndihmonin në kontrabandimin e narkotikëve përmes metodës së njohur si “grepi i verbër”, që konsiston në ndotjen e kontejnerëve pa dijeninë e transportuesve të ligjshëm.
Më 6 shkurt 2024, pas një bastisjeje në një rezidencë në Guayaquil, Prokuroria e Përgjithshme e Ekuadorit identifikoi Gjikën si drejtues të mafias shqiptare në vend. Ai pritet t’i dorëzohet autoriteteve përkatëse për të nisur procedurat e ekstradimit.
