Tetë persona kanë rënë në prangat e policisë spanjolle pasi dyshohen për krime kundër shëndetit publik, pjesëmarrje ne një grup kriminal, vjedhjeve dhe mashtrimit të energjisë elektrike. Personat e arrestuar ishin të shtetësive lituaneze, greke, shqiptare dhe spanjolle. Në kuadër të operacionit “Luz verde” u bë e mundur edhe çmontimi i katër plantacioneve të marihuanës dhe sekuestrimin e 485 kilogramëve të drogës (2,721 bimë) .
Media spanjolle ‘Lasprovincias‘ shkruan se droga e mbjellë ishte e lokalizuar në Castellon, Lliria dhe Burjassot. Agjentët verifikuan në regjistra që ekzemplarët ishin në faza të ndryshme të zhvillimit për të garantuar furnizim të vazhdueshëm me drogë në treg.
Operacioni ka filluar që vitin e kaluar dhe gjatë tij agjentët zbuluan një ndryshim në vendndodhjen e bimëve, duke shkuar nga zonat rurale dhe shtëpitë e vjetra të pabanuara në shtëpitë luksoze. Dyshohet se autorët në këto vende bënë investime të mëdha financiare për të bërë të mundur fshjehjen e aktivitetit kriminal. Ndër të tjera, ata vendosën si mbrojtje në shtëpitë e tyre armë dhe qen të rrezikshëm për të parandaluar hyrjen e të huajve.
Sistemi i kultivimit ishte i brendshëm me të gjithë elementët e nevojshëm që garantonin prodhim të përhershëm. Në plantacione kishte pajisje komplekse ndriçimi, nxjerrës për të hequr ajrin e ndenjur, filtrat e aromës, dhe termo-higrometrat për të matur temperaturën dhe lagështinë.
