TIRANË
Qytetarët shqiptarë po përballen me një radhë të paparë të automjeteve në Kakavijë, të cilat presin që të hyjnë në tokën greke.
Radha e mjeteve është e gjatë dhe shkon deri në fshatin Jurgacat, që është afër 20 kilometër larg doganës.
Ka persona e familjarë që ndodhen aty ka 3 ditë e situata sa vjen e bëhet më kaotike. Pala greke kërkon bërjen e tamponit për të kaluar në tokën helene dhe kjo besohet se është arsyeja përse ka kaq vonesa.
Në lidhje me këtë ngjarje problematike të ditës së sotme, ka reaguar në “Facebook” edhe presidenti i vendit Ilir Meta.
Meta i bën thirrje MEPJ-së që të vendosë menjëherë kontakte me palën greke, kurse shton se duhet të gjendet një zgjidhje, në mënyrë që qytetarët të mund të lëvizin lirshëm.
Postimi i presidentit Ilir Meta:
Thellësisht i shqetësuar për situatën në të cilën ndodhen qytetarët shqiptarë të cilët vijojnë të jenë të bllokuar prej shumë orësh në pikën kufitare të Kakavijës, duke u ekspozuar seriozisht para rrezikut të përhapjes së pandemisë COVID-19.
I bëj thirrje urgjente Qeverisë dhe Ministrisë për Europën dhe Punët e Jashtme, të vendosin kontaktet me palën greke, për të marrë të gjitha masat për lehtësimin dhe garantimin e lëvizjes së lirë të qytetarëve në anën tjetër të kufirit.
Zgjidhja duhet të jetë e menjëhershme!
