Kaosi i madh dhe situata e pazakontë në Kakavijë këto tri ditët e fundit ka bërë që Ministrja e Mbrojtjes, Olta Xhaçka dhe drejtori i Agjencisë Kombëtare të Mbrojtjes Civile, Haki Çako të nisen drejt kësaj pike kufitare për të parë më afër gjendjen e qytetarëve dhe punës që po bëhet nga pala jonë.
Mësohet se ministrja Xhaçka do të takohet me drejtues të pushtetit vendor dhe policisë, për gjetjen e zgjidhjes sa më shpejtë të qytetarëve që prej tre ditësh presin për të kaluar kufirin në temperatura të larta, pa ushqime dhe pa kushte higjenike.
Gjithashtu janë nisur drejt Kakavijës edhe efektivë të Batalionit të Mbështetjes Rajonale të Forcave të Armatosura me një automjeti të posaçëm me 10 mije litra ujë si dhe ekipe mjekësore për t’u ardhur në ndihmë qytetarëve të bllokuar.
