Në lidhje me protestën e dhunshme të thirrur nga ish-kryeministri Sali Berisha, ka ardhur një reagim nga Prezenca e OSBE në Tiranë.
Përmes një postimi ajo është shprehur se është në ndjekje të zhvillimeve më të fundit pranë Selisë së Partisë Demokratike dhe bëri thirrje që të gjithë personat që janë të përfshirë të përmbahen nga aktet e dhunshme.
Gjithashtu vlerësoi policinë e shtetit për ruajtjene rendit publik.
“Prezenca e OSBE-së po ndjek zhvillimet e sotme pranë selisë së Partisë Demokratike. Ne nxitim të gjithë aktorët e përfshirë të përmbahen nga çdo akt dhune dhe vlerësojmë policinë për ruajtjen e rendit publik. Protestat paqësore janë në themel të demokracisë.”- thuhet në reagimin e OSBE.
Pas protestës ish-kryeministri Sali Berisha ka mbyllur tubimin me premtimin se do të rikthehet sërish deri në arritjen e qëllimit final.
“Kjo protestë iu faktoi shqiptareve fytyrën e vërtetë të regjimit të sotëm. Ju faktoi në mënyrë përfundimtare se Edi Rama mban peng Lul Bravën dhe së bashku me të, me dhunë dhe terror, shtëpinë e PD-së. Ky përbën një akt të pashembullt në 30 vite. Përpjekjet për të shkuar në shtëpinë e lirisë, do të vazhdojnë deri në arritjen e qëllimit. Sot ne do të shpërndahemi. Do të kujdesemi që vëllezërit tanë dhe motrat e arrestuara. pasi janë vërsulur si bisha ndaj tyre për të mbushur komisariatet. Do të kujdesemi për të plagosurit, të cilët janë goditur me çarje koke dhe në forma të tjera. Do njofton shumë shpejt betejë tjetër të cilat nuk do të ndalen kurrë, deri në fitoren tonë.”, tha Berisha.
