Si çdo vit, mesi i gushtit sjell në atdhe mijëra emigrantë që jetojnë dhe punojnë në vendet fqinje. Vetëm gjatë pesë ditëve të fundit, më shumë se 37 mijë persona kanë kaluar nga Greqia në Shqipëri përmes pikës kufitare të Kapshticës.
Megjithatë, problemi i zakonshëm vazhdon të përsëritet edhe këtë sezon: mungesa e personelit dhe puna me sportele të reduktuara nga pala greke në pikën kufitare të Krystallopigi kanë shkaktuar radhë të gjata, ku automjetet presin deri në më shumë se 2 kilometra për të hyrë në territorin shqiptar.
Ndërkaq, autoritetet shqiptare po bëjnë maksimumin për të lehtësuar pritjet dhe shmangur bllokimet, duke punuar me kapacitete të plota. Megjithatë, me pritshmërinë e fluksit në rritje, sidomos për shkak të Festës së Birrës në Korçë që do të mbahet së shpejti, situata në kufi mund të përkeqësohet.
Në këtë kuadër, qytetarët kërkojnë më shumë koordinim dhe bashkëpunim mes autoriteteve shqiptare dhe atyre greke, duke u shprehur se është e domosdoshme të rriten kapacitetet e përpunimit në kufi për të shmangur përsëritjen e vonesave dhe radhëve të gjata, të cilat tashmë janë kthyer në një problem kronik dhe të pakëndshëm për të gjithë.
