Një ngjarje e rëndë ka ndodhur në Liverpul gjatë festimeve për fitoren e skuadrës së futbollit FC Liverpool.
Një automjet ka hyrë me shpejtësi në turmën e tifozëve, duke shkaktuar përplasje masive dhe panik. Si pasojë, janë raportuar 27 persona të plagosur, përfshirë edhe katër fëmijë.
Incidenti ndodhi teksa ekipi po parakalonte nëpër qytet me një autobus të hapur për të festuar titullin kampion. Itinerari përfshinte rreth dhjetë milje dhe pritej të tërhiqte afër një milion njerëz.
Policia bëri të ditur se ka ndaluar drejtuesin e mjetit, një 53-vjeçar britanik nga zona përreth. Motivet e ngjarjes mbeten ende të paqarta dhe hetimet janë në vijim.
Ngjarja u raportua rreth orës 18:00 sipas orës lokale. Dëshmitarë okularë thanë se panë një automjet me ngjyrë të errët që hyri mes turmës duke shkaktuar kaos dhe dëgjuan britma të shumta.
Reagimet zyrtare erdhën menjëherë. Kryeministri Keir Starmer u shpreh në platformën X se ishte thellësisht i tronditur dhe shprehu solidaritet me të plagosurit dhe familjarët e tyre.
Ai falënderoi gjithashtu forcat e rendit dhe shërbimet e emergjencës për ndërhyrjen e shpejtë. Ministrja e Brendshme Yvette Cooper e cilësoi ngjarjen si “skena të tmerrshme dhe tronditëse”.
Në vendngjarje kanë ndërhyrë menjëherë shërbimet e emergjencës. Ambulanca e rajonit North West bëri me dije se po bashkëpunon me autoritetet për të garantuar ndihmën mjekësore për të gjithë të lënduarit.
