Policia e Shtetit ka referuar në SPAK materialet për demokratët Edi Paloka dhe Klevis Balliu, në lidhje me incidentin e ndodhur me gazetarët gjatë protestës së organizuar nga Partia Demokratike të premten, më 16 maj, në Bulevardin e Ri në Tiranë.
Sipas njoftimit zyrtar, materialet janë dërguar në Prokurorinë e Posaçme pasi gazetarja B. D. ka bërë kallëzim penal, duke deklaruar se gjatë protestës është kanosur me fjalë nga dy përfaqësuesit e opozitës, për shkak të detyrës së saj si gazetare.
Në pamjet e publikuara nga protesta, shihet se Edi Paloka ka pasur një debat të ashpër me disa gazetarë, situatë që ka shkaktuar reagime të menjëhershme edhe nga protestuesit, disa prej të cilëve kanë ndërhyrë duke shtyrë e ofenduar përfaqësues të mediave.
“Mos bëj skema këtu! U bëtë ju! Kam qenë gazetar 20 vite para jush”, dëgjohet t’u drejtohet Paloka gazetarëve, deklaratë që u pasua nga tensione në radhët e turmës.
SPAK pritet të shqyrtojë materialet e referuara për të vendosur nëse do të nisë hetim penal për kanosje ndaj gazetares.
