Një 19-vjeçar është arrestuar në Lezhë për kanosje ndaj një efektivi policie, pas një kontrolli rutinë të automjetit.
Sipas njoftimit të policisë, ngjarja ka nisur kur patrulla ndaloi një automjet dhe konstatoi se ai kishte xhama të errët pa leje.
Pas heqjes së mbulesave të xhamave nga policia, drejtuesi i mjetit nuk reagoi, por pasagjeri, Rafaelo Lleshi, 19 vjeç, kundërshtoi duke ofenduar punonjësit e policisë.
Më pas, i riu ka dërguar mesazhe kërcënuese në celularin e efektivit të policisë. Ai u arrestua dhe materialet iu referuan Prokurorisë për veprime të mëtejshme.
Njoftimi:
Më datë 08.12.2024, rreth orës 18:00, në qytetin e Lezhës, në afërsi të shinave të trenit, punonjësit e Policisë në përmbushje të detyrave të përcaktuara në planin e masave për rritjen e parametrave të sigurisë publike e asaj rrugore, kanë ndaluar për kontroll automjetin tip “Golf”.
Gjatë kontrollit të mjetit nuk i është gjetur asnjë send i kundraligjshëm, ndërsa gjatë kontrollit të dokumentacionit të automjetit rezultoi se, drejtuesi i automjetit nuk dispononte dokument për xhamat e errësuar të makinës dhe për këtë arsye punonjësit e Policisë i kanë hequr veshjen që kishte vendosur për të errësuar xhamat e automjetit.
Drejtuesi i automjetit nuk ka kundërshtuar, por, shtetasi Rafaelo Lleshi 19 vjeç, pasagjer në këtë automjet, ka kundërshtuar dhe ofenduar punonjësit e Policisë si dhe, njërit prej tyre i ka dërguar menjëherë në celular një mesazh kërcënues për shkak se i hoqi veshjen që kishte errësuar xhamat e automjetit shoku i tij.
Veprimet procedurale janë kryer nga OPGJ i Prokurorisë dhe në përfundim të veprimeve është bërë arrestimi në flagrancë i 19-vjeçarit, shtetasit R. Ll., banues në Lezhë.
Materialet procedurale iu referuan Prokurorisë për veprime të mëtejshme për veprën penale “Kanosja për shkak të detyrës”.
