Një shtetas 42-vjeçar është arrestuar në fshatin Gizavesht të Librazhdit, pas një konflikti me fqinjin e tij për çështje pronësie, ku ai qëlloi me armë gjahu në ajër për ta kërcënuar.
Pas marrjes së informacionit, shërbimet e Policisë së Librazhdit kanë ndërhyrë menjëherë në vendngjarje, duke parandaluar përshkallëzimin e situatës dhe vënë në pranga autorin e dyshuar, shtetasin S. Xh.
Nga hetimet paraprake rezulton se konflikti ndodhi mes S. Xh., 42 vjeç, dhe fqinjit të tij, H. Xh., 80 vjeç. Gjatë përplasjes, i riu ka përdorur armën për të trembur të moshuarin, duke qëlluar në ajër. Fatmirësisht, nuk është raportuar për persona të lënduar.
Në cilësinë e provës materiale, policia ka sekuestruar armën e gjahut si dhe një sasi municioni luftarak, të cilat rezultuan të paautorizuara.
Materialet procedurale janë referuar Prokurorisë pranë Gjykatës së Shkallës së Parë të Juridiksionit të Përgjithshëm Elbasan, për veprime të mëtejshme ligjore.
