SPAK ka nisur hetimet për ish-ministrin e Turizmit, biznesmenin Pëllumb Salillari dhe kryetarin e Bashkisë së Kuçovës, Kreshnik Hajdari. Ata janë paditur nga banorët e Sinecit për lejen e ndërtimit që kanë dhënë për ndërtimin e ujësjellësit në kanionin e kësaj zone. Vetë kreu i SPAK, Arben Kraja e ka konfirmuar lajmin nëpërmjet një shkrese zyrtare. Hetimet ndaj tyre po kryhen për veprën penale “shpërdorim detyre”.
Kallëzimi i banorëve të fshatit Lumas në Kuçovëështë bërë më 3 korrik 2021. Ata kanë kundërshtuar vazhdimisht përmes protestave dhe rrugëve ligjore, ndërtimin e ujësjellësit, pasi sipas tyre do të dëmtojë kanionin e Sinecit.
Siç raporton Ora Neës, Kraja thotë në letrën e tij se procedimi është në fazën e hetimeve parprake dhe tashmë janë nisur në prokurori verifikimet e plota dhe të gjithanshme.
Kujtojmë që 123 banorët e Lumasit paraqitën në SPAK një kallëzim penal për “Shpërdorim detyre”, kundër kryetarit të bashkisë së Kuçovës Kreshnik Hajdari, ish-ministrit të Turrizmit Blendi Klosi dhe biznesmenit Pëllumb Salillari.
Ata kanë thënë vazhdimisht se Hajdari ka miratuar lejen për ndërtimin e ujësjellësit, në një zonë që është e mbrojtur dhe është shpallur Monument Natyre me vendimin e Këshillit të Ministrave të vitit 2002, për shpalljen si zonë e mbrojtur dhe Monument Natyre.
“Bashkia Kuçovë nëpërmjet kryetarit të bashkisë Kreshnik Hajdari, ka nxjerrë një leje ndërtimi dhe pikërisht leja Infrastrukture e datës Tetor 2020, e cila do të ndërtohet në Kanionin e Lumit Sinec,e cila është zonë e Mbrojtur dhe shpallur Monument Natyre”-thuhet në kallëzimin penal të banorëve.
Ata kanë denoncuar gjithashtu se ky ndërtim i kalon limitet, pasi në të parashikohen 4 Ujësjellësa, për të cilët zona as nuk ka nevojë, duke qenë se ka burime uji të mjaftueshme, ndryshe nga ç’pretendon Bashkia, që ka dhënë lejen e ndërtimit.
Prej muajsh, banorët kanë protestuar kundër këtij projekti dhe e kanë quajtur tendering prej 361 milion lekësh të reja, një aferë korruptive. Ata janë përballur vazhdimisht me rezistencën e punonjësve të firmës “Salillari” dhe me dhunën e policisë. Kjo e fundit është bërë krah me firmën private dhe është bërë gjithnjë mburojë që ajo të vazhdojë punimet. Ata kanë kallëzuar në SPAK edhe kryeinspektorin pranë IKMT-së Tiranë, Albert Zybeja, për “shpërdorim detyre”. Sjellim në vëmendje se banorët e Lumasit më parë kanë depozituar në SPAK edhe një kallëzim për kryetaren e bashkisë Dimal, Juljana Memaj.
