Teksa numri i të infektuarve nga COVID-19 në Kosovë ka shkuar në 20 persona, edhe kryeministri i Kosovës, Albin Kurti, bashkë me stafin e tij, u janë nënshtruar analizave të COVID-19 pasi kishin kontaktuar me disa të infektuar.
Fatmirësisht, rezultatet e analizave kanë dalë negative dhe lajmin është bërë me dije për Gazetën Express nga zëdhënësi i qeverisë së Kosovës, Përparim Kryeziu.
“Rezultatet nga analizat kanë dalë negative për të gjithë. I ftojmë që të gjithë të vazhdojnë me respektimin e masave të vendosura nga Qeveria dhe këshillave të profesionistëve”, ka thënë ai.
Të hënën u bë me dije se Kosova pritet që të marrë 20 mijë aparatura që tregojnë për 10 minuta nëse pacienti është apo jo me Coronavirus.
Kosova blen 20 mijë aparatura që tregojnë për 10 minuta nëse je i infektuar nga COVID-19
Të premten Kosova u prek nga COVID-19, pasi u konfirmuan zyrtarisht dy të infektuar me Coronavirus.
Tashmë janë 20 të infektuar të cilët ndodhen në Klinikën Infektive të Qendrës Klinike Universitare të Kosovës dhe gjendja e tyre shëndetësore është e qëndrueshme.
Në këto kushte Qeveria e Kosovës ka shpallur gjendjen e jashtëzakonshme dhe lajmi është bërë i ditur nga Ministria e Jashtme, që u ka bërë thirrje të gjithë qytetarëve brenda dhe jashtë vendit që nëse kanë simptoma të Coronavirusit të telefojnë në numrat sipas shteteve përkatëse.
Kosova shpall gjendjen e emergjencës nga COVID-19, thirrje shqiptarëve të diasporës
Qeveria e Kosovës ka marrë një sërë masash për parandalimin e përhapjes së Coronavirusit, teksa janë ndaluar hyrje-daljet për të gjithë qytetarët në komunat e Klinës dhe Vitisë, ku u shënuan dy rastet e para.
Ndërkohë, është vendosur mbyllja e institucioneve arsimore deri më 27 mars, pezullimi i përkohshëm i linjave ajrore dhe tokësore dhe pezullimi i të gjitha aktivitetet publike.
Po ashtu është ndërprerë edhe transportit ndërurban dhe janë mbyllur kufijtë tokësor për të gjithë ata që hynë në Kosovë, ndërsa sot janë mbyllur të gjitha lokalet, baret e qendrat tregtare, ku përjashtim bëjnë vetëm dyqanet ushqimore dhe farmacitë.
Kurti bëri të ditur se kanë bërë edhe pezullimin e përkohshëm për të gjitha linjat e udhëtimit në Aeroportin “Adem Jashari”, ku përjashtim bëjnë vetëm fluturimet ushtarake apo medicinale.
